دعوة للتدخين
اوعى تسمع كلام اللي يقول لك بطل سجاير ، دة يبقى واد توتو وما يعرفش فوائد التدخين!!!
التدخين يضفى عليك مظهر الرجولة
اذا كنت حاسس انك عيل ومنظرك ما يجيبش راجل ابدا ، امسك سيجارة ونفخ في وش الخلق . هيفتكروك راجل على طول
التدخين ببطء وبتركيز يعطى ايحاء بأهميتك وعمق تفكيرك
اذا كانو الناس مستهيفين شخصيتك ومانتش مالى عينهم ، ولع سيجارة ، اسحب كل نفس منها ببطء جدا وانفخه لفوق بعنطزة ، الناس هيفتكروا انك عقلية علمية معملية فذة !!!
تدخين السجاير علاج ممتاز لبطء التفكير
اذا اتزنقت وذكائك مش ساعفك بتصرف سريع ، ولع سيجارة ! على ما تولع وتشد وتنفخ ، يكون ربنا فرجها وحتة الدهنة اللي جوة الجمجمة طلعت رد ! وما حدش يلحق يحس انك موحوس !
التدخين يجمع البنات الحلوة حواليك
ويحوطوا سريرك كمان ! ويقعدوا يتغزلوا فيك ويقولوا لبعضهم : يا سلام لو كل العيانين اللي بيدخلولنا قسم الامراض الصدرية شباب حلوين كدة !!!
التدخين يحافظ على صحتك من الامراض المعدية
طبعا ، ما الدبان نفسه مش هايهوب ناحيتك وحيقرف من ريحة بقك !
التدخين يحافظ على مظهرك ويحميك من مشاكل الشيخوخة !
ما هو حايموتك بدري قبل ما تلحق تشيب او تصلع !!!
السيجارة تكسبك الاحترام
أول ما تدخل حتة الناس تقوم واقفة على حيلها ! ويروحوا جري يفتحوا الشبابيك !
التدخين يضفي عليك سيما الوقار والهدوء
لو انت بتدخن من زمان وحاولت تمشي بسرعة او تجري وتنط السلم زي العيال ، حاتنهج ونفسك يتكرش وحاتبقى حالتك تصعب ع الكافر !
السيجارة بتهدى اعصابك لما بتكون متغاظ
هو صحيح في حاجات كتير ممكن تهدي الاعصاب زي الينسون و الكركديه ، بس شكلك بالسيجارة بيحسس الناس انك فعلا شايط وبتطلع دخان !
السيجارة تساعدك على تجاوز المحن والفرفشة
دايما في الافلام العربي اول البطل ما تحصله مصيبة ، يطلع عالكباريه ، السيجارة في ايد والكاس في ايد وفي اخر الفيلم يتجوز الرقاصة !
السجائر تحسن سلوكك وتحميك من الانزلاق في الرذيلة
ما انت لو بس حاولت تقرب من واحدة حاتقرف من ريحة بقك وتهشك فورا
التدخين يحسن علاقتك بزوجتك
انت بتفقد حاسة التذوق تدريجيا ، فمش هاتاخد بالك من طعم العك اللى مراتك بتعمله ، وتوفر على نفسك البهدلة لو اتريقت على طبيخها!
وبرضوا انا جايبة معايا اخبار مطمئنة جدا للمدخنين
في اشاعات مغرضة بيطلعوها علشان يخوفونا من التدخين ، اوعى تصدقهم وخليك جاهز بالرد:
التدخين يتلف الرئة
وايه يعني ؟!!! مانت عندك رئة تانية ، وقد اثبتت الابحاث العلمية الحديثة ان الانسان ممكن يعيش برئة واحدة
وبعدين افرض يا اخى ان الاتنين باظوا ، خلاص بقى يبقى قضاء وقدر
التدخين بيجيب سرطان
وايه يعنى؟!!! معظم انواع السرطان بيتعالج دلوقت
وبعدين في اكتر من 100 حاجة تانية بتجيب السرطان غير التدخين ، خليها على الله وعفر !
النيكوتين يسبب الادمان
لايوجد شئ اسمه ادمان النيكوتين ، كل الناس اللى عندها شخصية قوية وكانت فعلا عايزة تبطل شرب سجاير نجحت في كدة ! ممكن تستعمل الجملة دىحجة تتلكك بيها قدام اللى بيقولولك بطل سجاير !!
وبعدين السجاير فيها حاجات تانية كتير غير النيكوتين ، القطران مثلا...ما بيسببش ادمان !!!
التدخين بيقصر العمر
دة نقص ايمان والعياذ بالله ، لكل اجل كتاب ، التدخين مش مكن يموتك قبل ميعادك اللى ربنا اختاره لك ، انما بالكتير ممكن يخليك تستمتع في اواخر ايامك بسرطان الرئة مثلا او يقطع صدرك بالكحة بتاعة الربو الشعبي او تصلب الشرايين او بأي حاجة من الامراض الحلوة دى !!!
الأحد يونيو 01, 2014 12:06 am من طرف الوكالة التجارية
